(ألَشُـأعر والَرادٍودٍ مًوٌسِـى أّلَخِـأدٍم )
قصائد مع الحانها لخادمكم موسى الخادم
رايتنه مرفوعه
صيحتنه مسموعه
للعسكري .... للعسكري
.........
شيب وشباب امحزمين الليله
اويه المهدي راعي العزه دم نبجيله
امصابه ثجيل ابحاجة الي ايشيله
بالصبر والتعجيل خل ندعيله
ما نشفت ادموعه
صيحتنه مسموعه
للعسكري .... للعسكري
.......
صيحتنه يابو المنتظر صيحتنه
باجر نعليهه ابعلو رايتنه
والشاهد اعلينه تضل دمعتنه
غايتنه مو نحصد اجر غايتنه
واحدنه بي لوعه
صيحتنه مسموعه
للعسكري .... للعسكري
.......
للعسكري واحدنه ذايب شمعه
و ما بطل اعليه الجفن بالدمعه
الهاي المصيبه كلشي بينه ينعه
حتى الكَلب يبجي المصابه انسمعه
كل نبضه مفجوعه
صيحتنه مسموعه
للعسكري .... للعسكري
.......
مثل اربعين حسين اله نتعنه
وننصب مواكبنه بطريق الجنه
للعسكري بَّصمنه بالدم كلنه
يرخصله كلشي المنه واحنه منه
وانضل رهن طوعه
صيحتنه مسموعه
للعسكري .... للعسكري
........
اويه المهدي باجر نعتني بالرايه
من كربله الصحن الحسن مشايه
وفايه نبقه اعله العهد وفايه
ومابينه ابد واحد يبدل رايه
والطحنو اظلوعه
صيحتنه مسموعه
للعسكري .... للعسكري
.........
✍️
كلمات . موسى الخادم
وحدك صفيت ابلا اهل
منك اخذ كلشي الاجل
يا صاحب الزمان
......
يا مهدي ... الله يعينك عالغرب
يا مهدي ... اهلك صفو جوه الترب
يا مهدي ... ليل وصبح دمعك يصب
يا مهدي ... ما ظلك ابناسك قرب
لاعم الك لا خال لا من عشيره
كل البقى وياك حيره جبيره
اخر اهل بيتك رحل
منك اخذ كلشي الاجل
يا صاحب الزمان
.....
هالليله ...اخر امانك ودعت
هالليله ... مات وعليه جنك متت
هالليله ... روحك اشكالت من شفت
هالليله .... كلك على وجهك طحت
عظمه المصيبه اهواي الله يعينك
كلشي التحب ابساع فاركَت عينك
جم غالي فاركت بعجل
منك اخذ كلشي الاجل
يا صاحب الزمان
.....
بمصابك ... يالمهدي الله ايساعدك
بمصابك.... عمرك مشه ابلا والدك
بمصابك ... ازغير وبقيت الوحدك
بمصابك .... بس حزنك اليتفكدك
من عمر خمس اسنين عشت المصيبه
ما واحد ابهل ناس مثلك نحيبه
حزنك فلا واحد وصل
منك اخذ كلشي الأجل
يا صاحب الزمان
.........
يالغايب ... الفاركَ ابوه محد اله
يالغايب ... روحه تصير امعلعله
يالغايب ... غربته غربة كربله
يالغايب ... عالخد دموعه اتبلله
الفاركَ ابوه ايموت من كَد ونينه
وبراسه يحجي الشيب خلصت اسنينه
بيك اشكثر يحجي العمل
منك اخذ كلشي الاجل
يا صاحب الزمان
......
وين انته ... يل ما ألك عيله وسكن
وين انته ... ناصب عزاء ابيا وطن
وين انته ... عالعسكري اعيونك عمن
وين انته ... دلينه يل عايش محن
عالعسكري المسموم هاي المسيه
ناصب عزائك وين يابو الحميه
دلينه يا اخر أمل
منك اخذ كلشي الأجل
يا صاحب الزمان
.....
✍️
كلمات موسى الخادم
يامهدي .... الله ايعظملك اجرك
يامهدي .... واعله امصاب الغالي يصبرك
يامهدي .... بعيون الزهراء اينظرك
يامهدي ....
......
ياحجت رب الكون .... الله ايصبرك ويعينك
بيدك هاي الساعات ... دافن اجمل شي بسنينك
حكك من تبجي ادموم ... يامهدينه وتلطم عينك
موت الوالد خلاك ... تسأل حالك عنك وينك
تبجي العين ... حكك ما واحد اليلومك
تبجي العين ... موت الوالد زاد اهمومك
تبجي العين ... ليل انهارك واضح قهرك
......
من عمرك خمس اسنين ... وانت اتعيش الهم واللوعة
ما شفت الفرحة ابيوم .... اكثر واحد تجري ادموعه
كل اليوم ايمر اعليك ... لازم روحك بي مفجوعه
حزنك بادي امن الباب...لحسين الكسروله اظلوعه
جم امصاب .... شافت عينك يبن الزهره
جم امصاب .... عايش جم لوعه وجم حسرة
جم امصاب .... بمصاب العسكري ايذكرك
.......
.
الله يعينك مولاي .... الكثرت احزانك واجروحك
دافن بيدك محبوب ... هدالك يالغالي اصروحك
ودعته ابيا كلمات ... من طلعت روحه ابلا روحك
نزلته الكبره اشلون .... يلحيلك منهد من نوحك
حيلك راح .... من شيعت الوالد بيدك
حيلك راح .... من مات ونظراته اتريدك
حيلك راح .... وانت زغير اشفت ابعمرك
.......
هاليوم ابسمراء .... حاضر لونك تنسئل
عالعسكري المسموم ... احمر دمع اعيونك يهل
كل ايامك عاشور .... كل احبابك ماتو قتل
مثل السامري اعداك ... عافو موسى وتبعو عجل
هاي الناس .... ما رحمو يالمهدي ابحالك
هاي الناس .... باكت كل احلام ابالك
هاي الناس .... ذبحو اهلك سمو ذخرك
......
نسأل يايوم الثار .... ياسيدي يبن الحسن
أمشين اعليك حسين ...وامك الزهره ام المحن
اغيابك طول مولاي ... ناسك نيواظرها انعمن
يايوم البيه اتعود ... ياجمعه انشوفك يا وطن
ليل انهار .... ندعي الله انصير امن انصارك
ليل انهار .... نحجي ابسمك نحجي ابثارك
ليل انهار .... دعوانه المعبود اينصرك
........
الحمد الله رب العالمين
اللهم صل على محمد وال محمد
موسى الخادم
قصيده رئيسية
شهاده الامام الحسن العسكري ع
أخر ليله وياكم ... باجر تغمض العين
لا تبجون لمصابي ... ابجو الذبح الحسين
عالماشرب كطرة ماي
أمصيبتي اهون بهواي
امن أمصيبة حسين ... امن أمصيبة حسين
........
باجر انه اتغسل ويتصله فوكي
موش اظل اعله الترب تنزف أعروكي
وناسي تحضرني وتشيعني بنواعي
وما اظل محتار بيني وبين شوكي
شوكي البناتي ... شوكي الخواتي ...
شوكي البنيني
حزني وعذابي ... همي ومصابي ...
هونه حسيني
انزل كبري بجفاني .... ما متسلب الثوب
ماظل بالشمس عاري ... راس وجسد مسلوب
الخيل ساحكته اهواي
امصيبتي اهون بهواي
.......
باجر انه اعليه كل محبوب باجي
وبنتي ما مسلوبه من عدهه التراجي
ولا ايدهه امحركات بنار خيمه
وماكو واحد طرف خاطرهه يحاجي
ما كيدوهه ... ما شتموهه ... مثل الحبيبه
لا شاهدت دم .. ضلع التهشم ... هاي المصيبه
لا للشام متيسره ... تاخذهه الاعادي
بخرابه ما يكعدوهه ... وتبقى اعلي تنادي
راسي بطشت متصح هاي
امصيبتي اهون بهواي
......
انه ملتمين عد راسي عيالي
وجدي بيدين الشمر راسه يلالي
فوك صدري ادموع ولدي وجدي حافر
فوك صدرة ايدوس زينب ما يبالي
تنظر ذبحته .... تنظر سحكته .... بالاعوجيه
عالرمح راسه ... كاطع انفاسه ... ودع رقيه
جدي ابعيد عن اهله ... سلبو منه روحه
وانه ابين اهل بيتي ... جرحي اهون اجروحه
ما ميت ابين اعداي
أمصيبتي اهون بهواي
...
امصابي وين اوين ذاك امصاب جدي
اني ما ظليت بين اعداي وحدي
ولا شفت سهم الذبح ركبت رضيعي
ولا تكطع بين اديه اغله ولدي
مثل ابنه الاكبر ... البلبر تتطشر ... كدام عينه
مو سهله صعبه ....مذبوح تعبه ... الله يعينه
متكطع وصل شافه ... مرمي اعله الوطيه
مدري ينوح لمصابه .. مدري مصاب اخيه
صاحب الغيره الوفاي
امصيبتي اهون بهواي
......
كل مصيبه هونتهه امصيبة الطف
امصيبتي لا شيء امام النحر والجف
كلشي ما ظل سالم ابعاشر محرم
حتى جبد حسين بمثلث تزرف
ما بية كلشي ...للكبر امشي ... جسمي اعله خيره
وحسين جسمه ... السجاد لمه ... ويلي بحصيره
من كد ما رفس شابع ... واصل صوب الاخيام
حار بجمعته اوليده .... ابزحمه ذيج الاسهام
ما بطل اعليه ابجاي
أمصيبتي اهون بهواي
......
كلمات
موسى الخادم
للعسكري ... طلعت ترف الراية
للعسكري ... من كربلاء المشايه
......
حفاي حضرو عالجدم ... يمشون اهل المعتقد
من كربله للعسكري ... كل سنه يزداد العدد
هاذي الشعيره باقية ... يحيها حتى البالمهد
عمر الرضيع اجم طفل ... حاضرها والعالم شهد
للعسكري ... كصدت حشود اهواية
للعسكري ... من كربله المشاية
......
زوار من كل صوب اجو .. شيب وشباب اجمعو
ما همهم ابعيد الدرب ... رايات حبهم شرعو
اعظم صور للتعزية ... للمهدي هاليوم ارفعو
لطم الصدر اول فرض.. واخر فرض كعدو نعو
للعسكري ... نصبو عزه الوفاية
للعسكري ... من كربله المشايه
......
كل واحد البيهم حضر ... شايل على امتونه جرح
بي لوعه من طف كربله .. وراس الحسين العل الرمح
حاضر يواسي المنتظر.. ماشي الدرب ليل وصبح
تعب المشي وتعب السهر ...كله بثواب المنذبح
للعسكري .... يسوه التعب والغاية
للعسكري .... من كربله المشايه
.......
نقلو مصيبه كربله ... السامره من حرك الخيم
وسط الصحن نصبو عزه .. عالدمعه قائم والالم
وكتبو قصيده ومستهل ... عباس يا راعي الشيم
محتاجك المهدي تجي ... اتنشف دموعه بالعلم
للعسكري ... كلشي انكتب بقراية
للعسكري ... من كربله المشايه
......
باجر الحجه ابن الحسن..ما ينسه كل واحد حضر
ليله مصاب العسكري .. ليلة مصاب المنتظر
كل دمعه كل نكله جدم ... مسجله يمه بكل فخر
واهل المواكب والخدم ... كاتب اسمهم من صفر
للعسكري ... كلمن خدم صح راية
للعسكري ... من كربله المشايه
......
كلمات
موسى الخادم
قصائد شهادة الامام الحسن العسكري ع
على الحسن ويلي وويلاه
......
يالناعي انعى بعالي الصوت
شد الرحال السفرت الموت
اشلون العظيم ايضمه تابوت
يونس بجاله من بطن حوت
بكسرت الخاطر صار ينعاه
.....
مات بغدر سم اليكرهون
واعليه جرت دمعات العيون
اظلم صبح من بعد هالكون
والعرش ناح اويه الينوحون
عظمه المصيبه يلي تهواه
.....
هالساعه روح المهدي ياناس
متوجرة ابنيران الارجاس
ازغير بعدة وشيب الراس
بفراك ابو ما ظلت انفاس
جم لوعه عاش بسبب فركاه
......
وين اليواسي بدمعت العين
قائم محمد ناصر الدين
ذايب دليله من الونين
ما شاف راحه بهاي السنين
سهم اليتم من زغرة صاباه
......
يم النعش متمدد يصيح
ساعه يكوم وساعها يطيح
اشبه بسعفه وتاخذا الريح
فاكد الحيل ودمعته تسيح
من البواجي انعمت عيناه
.......
شيع المهدي والدة اليوم
مو بالمدامع لا بالدموم
عظمه المصيبه حكه مالوم
بيه انزرع كل حزن معصوم
الله يعينه العظم بلواه
.....
للمهدي نرفع تعزيتنه
بلطمت صدرنه الشرفتنه
تحت امره نوضع تضحيتنه
ما نخلف اويا قافلتنه
لخر نفس باقين وياه
......
الحمدالله رب العالمين
اللهم صل على محمد وال محمد
موسى الخادم
يا مهدي .... الله يعظم أجرك
يا مهدي .... الله يعظم أجرك
......
نرفع تعزيتنه ... برايات الوفاء
ياراعي المصيبه ... يا راعي البكاء
ما نشفت دمعتك ... تجري من دماء
للهادي محمد .... هالليله العزاء
من يومك ... لحبابك ... دمعاتك تهل
مو كافي... اعليك الطف ... مو كافي الهزل
كل ليله ... اعله امصيبه ... تطفه وتشتعل
يا مهدي .... كون الله حار بصبرك
يا مهدي .... الله يعظم أجرك
......
يومية اعله غالي ... ناصب مأتمك
لوعات ومصايب ...كثره ابعالمك
فاتحتك جبيره ... وشحت وادمك
بس حزنك حضرهه ... بدمعه ايكلمك
يا مهدي ... وبعيونك ... حلمك منذبح
عاشورك ... ما يخلص ... مثل المنذبح
بحزانك .... واهمومك ... جرحك منفتح
يا مهدي .... جم شده كسرت ظهرك
يا مهدي .... الله يعظم أجرك
.....
ايامك جبتهه ... حسرات ومحن
ما لحضه عشتهه ... الفرحه ابهل زمن
من كد البواجي ... اعويناتك عمن
وكل ساعه التمرك .... تبجي اعله ام حسن
بكتابك .... لا فرحه ... اتمرك يا أبي
ايامك .... تكضيهه .... اتنوح اعله السبي
ولجدك .... حد موتك ... حزنك زينبي
يا مهدي .... ونار الخيام ابكترك
يا مهدي .... الله يعظم أجرك
.....
ياحجة زمانك .... ثاراتك كثر
من الهادي تبدي ... وتنهه ابلا ذكر
ندعيلك يغالي ... بتعجيل الامر
ندري بكلبك انت ... مل من الصبر
كل جمعه ... نترقب .. جيتك يا شهم
انصارك ... متحزمه .. يا نعم الزلم
جم ندبه ... نقرالك ... يا اجمل اسم
يا مهدي ...ورايات الك تنتظرك
يا مهدي .... الله يعظم أجرك
......
✍
كلمات . موسى الخادم
أخي ... يا محمد
أخي ... يا محمد
أخي ... يا محمد
........
مو وكتهه افراكَك ... يمي وانه اشتاكَك
اكَعد وحاجيني .... يا أعز من روحي
كسرتي بغيابك .... تشهدلهه احبابك
دمعي ما يكفيني .... اعليك يابو اجروحي
بحاجتك انه علي يا بو علي
لا تخليني اوية حزني مبتلي
راح اقره اما يجيب انه وهلي
بلكت الباري يردك ساعه الي
أخي ... حزني سرمد
أخي ... يا محمد
......
إلي فتح اعيونك .... ظلمه عمري بدونك
يا عضيدي الغالي ... كلشي بيه ايريدك
ابحيره لتخليني .... موتك ايأذيني
جبت عمري وأنه ... امشي لازم ايدك
انه بعدك راح اعيش ابلا أهل
وتندفن وياك ضحكاتي بعجل
وما يضل بالدنيه عندي كل أمل
بس جسد راح ابقى ويتاني الاجل
أخي ... مالي احد
أخي ... يا محمد
.......
أنته يا عافيتي .... الهوه اليدخل ريتي
اشلون اعيش بدونك ... وانت راعي انفاسي
يا أخوي الغالي ... أكَعد انظر حالي
ميت انه ابموتك .... وشيبي تارس راسي
كَلبي ما ينطيني انزلك حفرتك
وين الكَه آنه بعد من خوتك
هاي هيه يعني ماكو شوفتك
كلشي ضاع امنيدي ساعة موتتك
أخي ... حيلي منهد
أخي ... يا محمد
.......
يا نبيَّ الرحمه .... داري بعدك ظلمه
ما تطبهه الفرحه ... بعد هاي الساعه
عمري اخلصه ابوحدي ... كل سند ما عندي
المثلي فاركَ خله ... يروي قصة اوداعه
المثلي وادع خله تجوي دمعته
وتخلص ايامه حزن حد موتته
وليله وانهاره يكَابل صورته
ومثل يعقوب اعله يوسف حالته
أخي ... راح مارد
أخي ... يا محمد
.......
راح اودعك اني ... وابقى موتي امتاني
موتي بعدك راحه ... ما أريد ايامي
موتي اهون عندي ... ولا اظل الوحدي
اوياك جبت اسنيني ... ابيقضتي واحلامي
ريت وياك ابفرد لحد وكَبر
شلي من بعدك يخوية ابهل عمر
كلشي بالدنية يهون الا الهجر
بية يترك يا حبيبي جم كسر
أخي ... روحي تشهد
أخي ... يا محمد
........
✍
كلمات : موسى الخادم
أبآخر ساعاته .... نزلت دمعاته
وعينه دار الفاطمه
.....
جان يعلم ... بعد موته ... ابنيته ياذوهه
والوصيه ... البيهه وصه ... ما يرحموهه
ولذلك عينه دار اعليهه
ودعاهه ابدمعته اليجريهه
جنه راد ابمحسن ايعزيهه
هاي قصته امن اول التاليهه
سولف بدمعه .... شيجري عل بضعه
من الصحّبه الظالمه
........
هوه يبجي .... وهيه تبجي ... ابساعة الفركَه
كلشي ساكت ... والمدامع ... تنزل ابحركَه
صوره ما ممكن ابد نسيانهه
بجَّت الدار وبعد حيطانهه
راس ابوهه الزهره بين احضانهه
قبل موته حضَّرت احزانهه
ابموتته خله .... بيهه جم عله
والشهد حامي الحمه
.......
ام ابوهه ... تنعى ابوهه ... ابكسرت الخاطر
ادكله بويه ... ياهو اليه ... لو رحت باجر
أُبقى يمي يا أعز من روحي
لا تخليني أظل وي نوحي
اوياك اخذني وانه احير ابروحي
ماكو غيرك بلسم اعله اجروحي
صاحت ابحركَه .... رايده الملكَه
يل عليك امعلمه
......
غمض عينه ... وعاف بنته .... بس علي وياهه
أشد موقف ... هذا مرهه ... وحيل اذاهه
أشد من كسر الظلع والعصره
ألماهه موت ابوهه الزهره
شيدت بيت الحزن بالعبره
وصارت اعليه تنتحب بالحسره
بالحزن عاشت ... لحد ما ماتت
الجفن نازف دمه
.......
جان عدهه ... الزهره ابوهه .... اغله ما عدهه
روحه فاضت ... بين اديهه ... وبقت وحدهه
بعده ما شافت فرح بعيونهه
ليل وانهار البجي ابماعونهه
ماكو واحد كال الله ابعونهه
انظلمت ابظلم الذي ايكرهونهه
بيهه ما رحمو .... جم ظلع كسرو
الخالفو حكم السمه
......
✍
كلمات : موسى الخادم