BnSamy

كده يا حكومة تطلعيني غلطان؛ يعني يوم 1 في الشهر أنا كتبت وقولت كل سنة وانتم طيبين شهر سبتمبر مش هيكون في زيادات أسعار والزيادة القادمة هتبقي نهاية أكتوبر وفقط 1.5 جنية زيادة بالبنزين
*️⃣
تقوم الحكومة تقول لا هطلعك غلطان وتزود النهاردة أسطوانة الغاز من 100 جنية لتصبح 150 العادية والكبيرة ب 300 جنية وزيادة سعر طن المازوت المورد لمحطات الكهرباء من 2500 جنيه إلى 6500 جنيه. وزيادة غاز صب غير شامل النقل من 8000 جنية الي 12 الف جنية
كده يا حكومة تطلعيني غلطان
😔
💔
💔

علي سيرة الإشاعات المغرضة بتاعة أخبار عودة قطع الكهرباء
😂
*️⃣
أنا مستغرب الأخبار جدا وشايفها مش سليمة وهقولك ليه... في البداية كده لما تخفيف الأحمال قل ثم وقف بداية يوليو لما حد كان بيسألني قولت هيرجع يوم 21 سبتمبر؛ والكلام دلوقتي (الاشاعات) إن التخفيف راجع من بكره 17 سبتمبر (قلشت معايا في 4 ايام عشان توقعت يبدأوا مع بداية الأسبوع)
*️⃣
لكن خلال آخر 3 أسابيع لما حد كان بيقولي تخفيف الأخبار راجع كنت بقوله لا مش هيرجع؛ سبب دا هو إن مصر عشان توقف قطع الكهرباء تعاقدت على قرابة 30 سفينة غاز مسال؛ فكان التوقع ان مع نهاية الصيف رسمياً (يوم الجمعة) استهلاك الكهرباء هيقل تدريجي وبالتالي مش محتاجين سفن كثير؛ لكن جت الأخبار إننا هنستورد وتعاقدنا علي 20 سفينة غاز كمان يبقي كده وش مع انخفاض الحرارة خلاص مفيش قطع كهرباء.
*️⃣
فدلوقتي الوضع هو إننا هنستورد غاز مسال وفي نفس الوقت هنخفف أحمال ونقلل استهلاك الغاز؛ طيب هنوديه فين
🤔
في الصيف كنا بنستهلك كل الانتاج المصري + مسروقات ولاد العم + سفن غاز... دلوقتي هنوفر من المصري وهنجيب سفن غاز والاستهلاك كمان لوحده هيقل؛ طيب ايه
🤔
🤔
.
*️⃣
في خبر طلع الأسبوع الماضي من شل وهو عودة الإسالة وتصدير الغاز؛ للي ميعرفش فمحطات الإسالة لازم تفضل شغالة والا التكلفة هتبقي عالية جداً؛ ف شل قالت إنها هترجع للتصدير يبقي هيوصلها غاز من الحكومة.
*️⃣
فممكن يكون مصر هتبعت لهم غاز يسيلوه ويصدروه ومصر تستورد غاز تاني للمحطات والمصانع ؛ هتقولي ليه كده صح؟ عشان مصر موقعة اتفاقية مع أصحاب المحطات لو بطلنا نديهم غاز هيزعلونا. ونرجع بالزمن زي اليومين دول من 2018 شركة يونيون فينوسا الأسبانية اخدت حكم ضد مصر بتعويض 2 مليار دولار عشان مصر بطلت تبعت لها غاز ليتم عمل اسالة ليه في محطة دمياط... بالمناسبة لاحقا في 2020 يونيون فينوسا باعت حصتها ل ايني الايطالية اللي عملت تسوية للقضية مع الحكومة. فغالبا كده قررنا بلاش مشاكل فنبعت لهم غاز... ال 2 مليار دولار بتوع الغرامة السابقة دول يجيبوا لنا 40-50 سفينة غاز يا عم فالطيب أحسن.
*️⃣
كل ما سبق شوية تخمينات مبنية علي إشاعات مغرضة إن الكهرباء هترجع تقطع تاني؛ إن شاء الله مش هيحصل تاني... احنا بالصيف استهلاكنا من الكهرباء بيوصل 38 جيجا وات ساعة... الشتاء بينزل ل 24 جيجا وات ساعة... يعني بنوفر ثلث الاستهلاك فكده توفير ضخم في الغاز؛ في الصيف بنحتاج فوق 5 مليار قدم غاز للكهرباء بس (و1 كمان للمصانع والبيوت ووو) ؛ ال 5 بتوع الكهرباء دول اكثر من انتاج مصر وولاد الكلب مجتمعين؛ بالشتاء الاستهلاك ينزل ل 3.5 مليار مثلا فمفروض انتاج مصر (4 مليار) هيكفيه وممكن كام سفينة بسيطة كده عشان تغطي الفارق بتاع المنزلي والصناعي... لكن اننا هنجيب نفس كثافة السفن في الشتاء زي الصيف وهنخفف احمال أصلا هي هتنقص الثلث
🤔
كلام غير منطقي ونتمني يكون غلط.

الحكومة أعلنت إيقاف دعم السماد ل 18 ألف فلاح ثبت سرقتهم الكهرباء... أيوا كده الضرب بيد من حديد على المخالفين... بس عندي سؤال؛ هو كده العقاب لمين للفلاح ولا لينا؟
*️⃣
يعني هو مفهوم السماد المدعوم معمول ليه؟ لزيادة ربحية الفلاح ولا تقليل الأسعار ؟ هو الاثنين هيوصلوا لبعض بس الفكرة نفسها تفرق في السبب.
*️⃣
يعني باختصار كده نتخيل محصول X بيباع الطن ب 10 الاف جنية؛ الفلاح بيكلفه 9 ويبيعه ب 10... فالدولة تقول للفلاح بس هديك سماد مدعوم وانتا كمل عادي البيع ب 10 الاف بس كده اكسب الفين او 3 الاف... اووووووو المنتج دا بيكلفك يا فلاح 9 وتبيعه ب 10 طيب بص هديك سماد مدعوم واخليك تكلفك 8 الاف مش 9 بس انتا برضك هتنزل سعر البيع ل 9 الاف مش 10 الاف. وبكده الدولة وفرت للمواطن السلعة X بتكلفة منخفضة... اوووو تكون التكلفة بقت 10 الاف عالفلاح فضمطر يزود السعر فتقرر تدعمه عشان يبيعه بنفي الأسعار
*️⃣
فلووو السماد هدفه زيادة ربحية الفلاح فشيل الفلاحين منه هيكون ضربة توجعهم... لكن لو هدف الدعم الاساسي هو المواطن وتقليل الاسعار عليه؛ فرفع وازالة الفلاح منه هيدفع ثمنه الشخص العادي.
*️⃣
اللي اقصده هو ان مهم فوي نعاقل الغلطان بس منلبسش الناس؛ زمااان كنت بسمع برنامج في الراديو (عارف محدش بيسمع راديو خلاص) وكان البرنامج بيجيب مسئولين... المهم حد اتصل وقال انه كان اشتكي ان المخابز في منطقتهم بتبيع جزء من الدقيق المدعوم وتقفل بدري عالساعة 12 فنلف عشان نجيب عيش؛ فالمذيع قاله المفروض المسئول تصرف فقاله صحيح؛ قفلوا 7 مخابز من ال 10 الموجود عشان مخالفين؛ والنتيجة بقينا بنقف طوابير أكبر بكثير وبقي صعب قوي نعرف نشتري
😔
😔
.
*️⃣
فاهمين علاج المشاكل بالطريقة دي؛ عاوزين نعاقب الفلاح المخالف فنزود أسعار الخضار والفاكهة؛ طيب هو كده اللي اتعاقب ولا احنا
🤔
🤔

العمارة اللي وقعت في شبرا من ساعتين كانت عمارة أهل زوجة شقيق زوجتي؛ وهي كانت معاهم وتوفاها الله
😔
شيء محزن جداً وخاصة لما تعرفوا إن شقيق زوجتي بقاله سنين بيحضر للزواج وبالفعل كتبوا الكتاب وحالياً كانوا بيجهزوا الشقة للفرح؛ لكن قدر الله وما شاء فعل ويلتقوا في الجنة إن شاء الله
ادعوا لها بالرحمة ويصبر شقيق زوجتي علي فراقه لزوجته

ما تيجوا نفكر بالعقل والمنطق كده
*️⃣
القرارات والتسهيلات الضريبية ووو اللي اعلنت عنها الحكومة إمبارح جميلة؛ هتلاقوها في كل المواقع فمش محتاجة اعادة كتابة اكتب بس تسهيلات ضريبية او حوافز ضريبية وهتطلع لكم… لكن يبقي سؤال واحد وهو ليه ؛ ليه المخالف يمشي صح؟؟؟؟
*️⃣
القوانين فيها تسهيلات للي مش شغالين قانوني انهم يخشوا المنظومة وتبسيط تعاملات للي تحت 15 مليون سنوي ووو؛ كلام حلو قوي وهنفترض إن كل دا هيتطبق ولو روحت فتحت ورق ضريبي مشيت رسمي ف اللي فات مات… ماشي مصدقك بس برضك ليه؟ اعمل دا ليه ؟؟؟
*️⃣
طبعاً هتقولي عشان تمشي قانوني؛ السؤال مستمر امشي قانوني ليه؟ أنا وتجار كثير أعرفهم ماشيين قانوني وطلعان عنينا والضرايب مبهدلانا؛ لا ورقة كذا مطلوبة لا فحص لا مأمورية تهرب وناس بتتحول للنيابة ووو... تخيلوا في تاجر قالي انهم طالبين منه حركة حركة تمت في شغله عملية عملية لكل منتج عنده اخر 5 سنين ولو مجابش هيتحول نيابة… تخيلوا
😡
😡
؛ ومش عاوز اقولكم أسماء شركات دلوقتي في الفحص والتهرب ودي شركات بتشتغل بال 9 اصفار شهرياً.
*️⃣
الناس دي مخالفة ولا الضرايب بتفترب عليهم؟ ممكن طبعا تلاعبوا شوية عدلوا ورق اشتروا فاتورة الخ الخ عشان يقلل اللي عليه؛ صح هو غلطان وبيتحاسب؛ مفروض يدفع للدولة 5 مليون شهري لكن هو تلاعب ودفع 3 مليون بس مثلاً … غلطان ومجرم صح.
*️⃣
طيب الاخرين؛ اللي بره المنظومة؛ اللي شغالين 100% شمال اللي لا بيدفع 5 ولا 2 مليون ولا حتي ربع جنية مخروم ؛ هو مفيش عند الضرايب؛ حد بيقرب لهم؟ الاجابة هي لا مفيش صفرررررر.
*️⃣
الضرايب كل ما تتزنق وتحتاج زيادة إيرادات تروح للي مسجلين عندها تفحصهم وتراجع وتدقق وراهم؛ اسمك عندنا نحلبك لسه في نقطة من حقنا عندك مش هنسيبها؛ لكن اللي بره المنظومة شغالين عادي؛ لسه هنفرهد ونجيبهم؛ احنا عندنا ناس عارفينهم وبنبهدلهم؛ نقرف نفسنا وندور علي حد منعرفوش.
*️⃣
فدلوقتي طالع تقول للي بره المنظومة تعالي سجل وهنسهل عليك؛ هل انت عبيط؟؟
🤔
🤔
يسجل ويعمل اقرار ضريبي ويشتغل قانوني ليه وهو حالته الحالية زي الفل؛ يقرف نفسه بنفسه؟ يروح يحط اسمه في قوائم المفشوخين زينا؟ يمرمط نفسه لييييه؟؟؟؟
*️⃣
العقل بيقول ان الخطة تبقي بإنك توجهه طاقتك عشان تشجع الكل يخش المنظومة الرسمية ودا يحصل بإنك تخلي حياة اللي بره المنظومة جحيم؛ وتتساهل مع اللي جواها شوية؛ فالناس تهرب كلها وتخش جوا؛ هنا تقفل الباب عليهم وتطوق فيهم ضرب…
*️⃣
لكن سايب بره جنة وتقولهم عندكم فرصة وعروض وتسهيلات عشان تخشوا الجحيم مع الآخرين
😂
😂
؛ دا iQ ايه دا يا ربي؛ نبقي قاعدين نحكي لاصحابنا المخالفين إننا مترمطين في الضرايب وهما في نعيم ولا عمر الضرايب قربت لهم؛ وتيجي تقولهم خشوا يلا زي أصحابكم قانوني؛ دا إيه العبقرية دي
😂
.
⬅️
طبعاً هيطلع لي حد كيوت ويقولي لا بيكافحوا التجارة الغير رسمية
😂
دا حقيقي وفودافون كاش شاهد عيان
😂
😂
... مش هضرب أمثلة تدمر لك الرواية التليفزيونية ال أحمد موساوية دي لكن هقولك اللي بيحصل في اللي بره 10% من اللي جوا
😭
😭
مفروض جوا يبقي مغري أكثر يا عم فهمت.

صديق عزيز باعت يقولي هي القرارات اللي طلعت النهاردة تفتكر بتفترق مع الشركات الصغيرة والمتوسطة ؛ فكنت هكتب الرد لصاحبي وبعدين قررت اعدله واكتبه رد بابلك:
*️⃣
بص يا صديقي؛ سمعت قرار جهاز حماية المستهلك ان أي حد يعلن عن سلعة او خدمة أو أي شيء لازم يكتب السعر وممنوع انبوكس... اتنفذ القرار دا صح
🤔
.
*️⃣
طيب سمعت قرار مصلحة الضرايب إن ممنوع حد ينزل بوست وميكتبش فيه الرقم الضريبي... اتنفذ صح واللي مكتبش اتحاسب؟
*️⃣
طيب سمعت قرار جهاز تنظيم الاتصالات إن الشركات تسجل رقم السريال نمبر عشان مكافحة تهريب الهواتف ووو...
*️⃣
طيب سمعت قرار اغلاق المحلات الساعة 10
😂
.
*️⃣
طيب قرار إن ممنوع مطور عقاري يعلن عن أي مشروع ويبيع فيه قبل تنفيذ 30% من المشروع لضمان إن المطور حاطط فلوس مش بيبني بفلوس الناس وهو في الأمان لو حصل حاجة قشطة أخلع مهي مش فلوسي... اتنفذ صح
😁
*️⃣
أنا مقرأتش يا صديقي القرارات بتاعة النهاردة؛ هشوفها طبعاً بس أنا اتعلمت حاجة وقالها برضك دكتور محمود محي الدين في لقاءه قبل أيام في بودكاست الحل ايه بتاع الجامعة الأمريكية وهي إن الكلام حلو؛ المهم ايه يتنفذ.
*️⃣
فأنا بصراحة بطلت اهتم بصدور أي قرار؛ وخلينا عالارض ونشوف ايه بيتنفذ... لكن الادراج مليانة قرارات. افتح الدرج وحط اي قرار جنبهم ؛ متخافش درج الحكومة واسع.

كنت واقف ملطوع في شارع قصر النيل ومنتظر Didi والسواقين بكنسلوا عشان فيزا فوقفت ثلث ساعة فقعدت اتسلي بإني اعمل احصائيات ع الشارع
*️⃣
الأول قعدت اشوف التاكسي؛ عدي قدامي 40 تاكسي (مكملتش بعد ال 40 عد) منهم 1 بس قافل ومشغل التكييف.
*️⃣
روحت انقل العد للملاكي وقررت ألغي حساب أي عربية من قبل سنة 2000؛ عدي قصادي 38 عربية مشغله التكييف و 33 عربية مش مشغلة التكييف... الشعب بيوفر او العربيات عطلانة.
*️⃣
نقلت العد للنوع؛ كل العربيات اللي عدت سايقها واحدة ست كانت مشغلة التكييف؛ كل العربيات اللي مش مشغلة التكييف كان سواق راجل.
⬅️
بس كده وبعدين الكابتن بتاع Didi وصل وركبت معاه وطبعاً مش مشغل التكييف
😭
😭
ولن ارحمهم في التقييمات (أنا كلامنجي وبيصعبوا عليا)
#️⃣
#️⃣
مع تحيات خواطر شاب تخين كان واقف بيتحمص في الشمس وافتكر بوست الرداءة بتاعه
💔
💔

لغاية ما ربنا يكرم واعمل فيديو التضخم وشرحه فالصورة دي مفيدة انها تعرفك الوزن النسبي لكل نوع سلع في المؤشر... يعني مثلا الملابس زادت طيب هي بتأثر أد ايه في المؤشر
🤔
.
*️⃣
شمال هتلاقي أرقام زي 222 دي هي مؤشر السلعة الحالي... الأساس اللي بيقارنوا بيه هو متوسط عام 2018/2019 دا يساوي 100 فلو لقيت قسم 297 يبقي يعتبر 300 يعني 3 اضعاف ال 100... يبقي البند دا السلع فيه بقت في المتوسط 3 أضعاف خلال 5 سنين.
الصورة في أعلي من تقرير المركزي الشهر الماضي

الجهاز المركزي أعلن عن زيادة التضخم في اغسطس ودا التضخم العام
فاضل اليوم البنك المركزي هيعلن عن التضخم الأساسي اللي كان 24.38% فهنشوف هيحصل فيه زي التضخم العام ولا ايه
😁

البنك الأهلي وبنك مصر بيقولك رفعوا ليميت استخدام الكريديت كارد بره مصر ووصل ل 187.5 ألف جنية للبلاتنوم و 300 ألف للسجنتشر والورلد واللي أعلى منهم.
*️⃣
طبعاً كل البنوك هتعمل زيهم ... قرار ممكن يكون مفيد للبعض لكن في قطاع ضخم القرار مش مفيد ليه لإن الدولار اليوم في البنك 48.4 لكن لو اشتريت هتتحاسب عليه 50.82 جنية.
*️⃣
ففي قطاع محترم من الناس راحوا عملوا بطاقات دولارية في نفس البنوك ودي بتدفع بيها بدون أي رسوم لو دولار و 1.5% لباقي العملات "في بنوك زي EG و AUB بقوا بدون رسوم). يعني لو قولنا الدولار ب 48.4 فلو دفعت عملة أخرى هتتحاسب ب 49.13 يبقى ليه تشتري بالكريديت كارد وتتكلف 1.5 جنية زيادة لكل ما دولار مكافئ تدفعه (وتتكلف 2.5 جنية لو الدفع أصلاً دولار).
*️⃣
حتى الناس اللي مش هتروح بنك تعمل بطاقة دولارية وليها في سكة الدولار الرقمي فبتشتريه ب 49.25 ويكلفها 49.75 لو اشتري بالدولار و 50.23 لو باقي العملات. يعني برضك أرخص من الكريديت كارد.
*️⃣
لازم البنوك تنزل عمولة التدبير ل 2% زي زمان ووقتها هتخلي الكل يستعمل الكريديت كارد... أصلاً لو الناس الطبقة A اللي عملوا بطاقات ورلد إيليت أو أنفينت كريديت كارد اللي قالوا لهم الليميت 300 ألف جنية (يعني 6 الاف دولار) فحضرتك لو حد منهم مسافر دخل ستور أبل وقال يشتري ماك بوك برو وآي فون 16 برو ماكس اللي هيعلن عنه النهاردة وساعة أبل ألترا الجديدة فال 300 ألف جنية دول ميكفهمش.
*️⃣
أيوا احنا غلابة بس الطبقة بتاعة الساحل دي تقولهم 300 ألف جنية شهري تبقى بتهزر... فهما إما هيستخدموا كارت حسابهم دولاري أبو ليميت 20 أو 30 ألف دولار شهري... أو كارت حسابهم USDT اللي يقدروا يدفعوا بيه مليون دولار لو حابين (100 ألف دولار بالمرة لو حسابهم فيه)... فتقولهم افرحوا خليت الليميت الشهري ميكملش 6 الاف دولار؟
*️⃣
لكن برضك هقول افتحوا الليميت لكروت الحسابات... مش ممكن واحد يا جدعان في ناس بتكلمني إنها عاوزة تشترك في خدمات ب 1 و 2 و 3 دولار ومش عارفين... طيب افتح كروت الحسابات ب 100 دولار شهري هتفرق مع الناس. اشتراك يوتيوب اشتراك في مواقع كورسات تشترط عليك تحط كارت عشان تاخد شهر مجاني وكده؛ انتا واقف حال بلد كاملة...
*️⃣
الناس العادية دي زبون عسل هيشتري منك بالكارت على 51 جنية عادي لإنه أصلاً عاوز 1 او 2 دولار فمش فارقه ال 5 جنية الزيادة... عكس اللي فوق هيصرف 10 الاف دولار فمش هيتكلف 15-20 ألف جنية زيادة عشان يستخدم كروتك... فهمت ولا صعبه.
⬅️
⬅️
⬅️
⬅️
الخبر الكويس إن بنكي الاهلي ومصر أعلنوا إنهم هيوفروا للمسافرين 5000 دولار ودا كده تطور محترم.