WT ARCH | DESIGN

دورة لينكدإن للمهندسين المعماريين والمصممين اليوم الخامس : السر وراء زيادة التفاعل والانطباعات ( Impressions ) على لينكدإن ملخص الأيام
1️⃣
إلى
4️⃣
: اليوم 1 – حدد هدفك وجمهورك • اعرف ليش عم تنشر (بناء براند؟ جذب عملاء؟ بيع خدمات؟) • ولمين (أصحاب فلل؟ مطورين؟…

دورة لينكدإن للمهندسين المعماريين والمصممين
اليوم الخامس :
السر وراء زيادة التفاعل والانطباعات ( Impressions ) على لينكدإن
ملخص الأيام
1️⃣
إلى
4️⃣
:
اليوم 1 – حدد هدفك وجمهورك
• اعرف ليش عم تنشر (بناء براند؟ جذب عملاء؟ بيع خدمات؟)
• ولمين (أصحاب فلل؟ مطورين؟ عيادات؟)
اليوم 2 – نوّع محتواك بثلاثة أنواع
• محتوى للانتشار – لزيادة الجمهور
• محتوى للخبرة – لتكسب ثقة المتابع
• محتوى للترويج – لتحويل المتابعين لعملاء
اليوم 3 – قوّي المحتوى بصرياً
• الصورة أهم من النص
• استخدم أدوات مثل: Canva، AI، مودبورد، قبل/بعد
• الهدف: تجذب النظر وتدفع للتفاعل والمشاركة
اليوم 4 – الاستمرارية أهم من الكمال
• نشر مستمر > نشر مثالي
• حضّر محتواك مسبقاً
• أعد استخدام أفكارك
• خزّن إلهامك
• خلّي النشر عادة وجدولة ثابتة
اليوم الخامس :
السر وراء زيادة التفاعل والانطباعات ( Impressions )
عم شوف كتير مهندسين ومصممين عم يشتغلوا وبيتعبوا على محتوى رهيب… بس مافي حدا عم يشوفو!
طيب شو الفايدة إذا المحتوى قوي، بس مافي حدا عم يوصلو؟
المشكلة ببساطة إنو في قطعة أساسية من معادلة النمو على LinkedIn كتير ناس عم يتجاهلوها:
التوزيع (distribution).
كيف بيعمل LinkedIn؟
لما حدا يعلّق على منشورك، نسبة من متابعينو بيشوفو منشورك لأنو علّق عليه.
يعني كل تعليق متل إعلان مجاني لمحتواك!
التعليقات = انتشار = تفاعل أكتر.
طيب، كيف بتجيب تعليقات أكتر؟
الجواب بسيط: علّق على منشورات غيرك!
مين لازم تتفاعل معهم؟
متابعينك الحاليين:
رد على كل تعليق بيجيك، هالشي بيبني علاقة وبيخليهم يرجعوا يتفاعلوا مع منشورك مرّة تانية.
عملاءك المحتملين:
هدول يلي ممكن يطلبوا خدمات تصميم أو إشراف مستقبلاً. علّق على منشوراتهم، ابعتلهم طلب اتصال، وبعد فترة بلش حوار بالرسائل.
فيك تبعتلهم شي مفيد مجاناً (PDF، mini course، أو كتيّب) وبعدين تعرض خدماتك إذا حسّيت بالفرصة المناسبة.
بس انتبه! لا تعرض عليهم شغلك من أول رسالة.
زملاءك بالمجال:
هني بيستهدفوا نفس جمهورك، فتعليقاتك على منشوراتهم بتخلي متابعينهم يشوفوك، وإذا هني علّقوا عندك، كمان متابعينهم بيشوفوا منشورك.
نصيحة عملية:
اكتب لستة بـ 15 حساب (5 من كل نوع)، وكل يوم خصص من 5 لـ15 دقيقة للتفاعل معهم.
كيف تلاقي هالناس؟
دوّر بكلمة مفتاحية متعلّقة بالمجال (مثلاً: تصميم داخلي فيلات - إشراف معماري - مخططات تنفيذية...)
فلتر النتائج حسب الأشخاص يلي بيقدموا خدمات.
اختار يلي عندن عدد متابعين منيح وبيشاركو محتوى بشكل دائم (5 مرات بالأسبوع عالأقل).
نوّع بين ناس عندهم جمهور كبير، وناس بنفس مستواك الحالي.
شو نوع التعليقات يلي بتخلي الناس يردوا ويزورو بروفايلك؟
علّق تعليق فيه قيمة، مو بس مجاملة.
اربط أفكارك بالمحتوى، أو شارك تجربة صغيرة من شغلك.
اسأل سؤال، أو اطلب توضيح لفكرة حكو عنها.
مثال على تعليق قوي:
"حبيت النقطة عن توزيع الإضاءة، بتتذكر مشروع اشتغلت عليه وكان عندي نفس التحدي، بس جربت أحلّه بطريقة تانية…"
ابتعد عن تعليقات سطحية مثل:
"رائع!"
"حبيت!"
"منشور مهم!"
الناس بتفهم دغري إنك عم تعلّق بس لتنشّط حسابك، وهاد ما بيخلي حدا يزور بروفايلك.
وبالنهاية لا تنسى الرسائل الخاصة (DMs)!
بعد فترة من التفاعل، فيك ترسل رسالة مهذبة وهادئة تبني فيها علاقة مهنية، سواء كانت بهدف التعاون، تبادل الخبرات، أو عرض خدمة باحتراف.
ملخص اليوم:
جهّز قائمة بـ15 شخص للتفاعل معهم يومياً.
خصص وقت محدد كل يوم لهالروتين (5-15 دقيقة).
خليك صبور... النتائج بتجي مع الاستمرارية.على لينكدإن

Just do the thing.
💪
Because you are what you do.
🎯
كم مرة خططت لتغيّر حياتك…
لبدء مشروع، تغيير مجال عملك ، تسافر لبرا ؟
لكن بقيت الفكرة... مجرد فكرة.
الحقيقة؟
الأفكار من دون تنفيذ… مجرد خيال.
والناس يلي عايشة الحياة اللي بتحبها، ما اكتفت بالحلم…
بدأت. خطوة بخطوة.
بخوف، بتردد، ولكن بثبات.
بدأوا بأول مشروع وهم مو متأكدين من النتيجة
اختاروا التحرك على انتظار الكمال
بنوا أعمال تخدم حياتهم، مو العكس
حولوا أيام الاثنين من رعب… لفرص
ما في شيء اسمه التوقيت المثالي.
في شي اسمه “ابدأ اليوم”.
الحركة هي الي بتغيّر الواقع.
مش النوايا، ولا الخطط المتقنة.
الدنيا ما بتكافئ الذكي بس ، بتكافئ المنفذ والمغامر.
الفعل هو الي بيخلق الفرق.
والحركة بتسبق الإنجاز، دايمًا.
فإذا كنت بدك تغيير فعلي،
ابدأ.
خد خطوة.
Just do the thing.
#تحفيز
#تطوير_الذات
#ريادة_أعمال
#ابدأ_اليوم
#معماريون
#مصممون_داخليون
#الهندسة_بشغف
#كن_أنت_الفرق

اليوم الرابع من دورة لينكدإن للمعماريين والمصممين
🎯
الاستمرارية أهم من الكمال
تلخيص مختصر وواضح للأيام الثلاثة الأولى:
⸻
اليوم 1: حدد هدفك وجمهورك
🎯
• ليش عم تنشر؟ (عملاء؟ براند شخصي؟ مبيعات؟)
• لمين عم تحكي؟ (أصحاب فلل؟ مطوّرين؟ أطباء؟)
⸻
اليوم 2: نوّع محتواك بـ3 أنواع
🚦
1. انتشار – لزيادة الجمهور
2. خبرة – لتكسب الثقة
3. ترويج – لتحويل المتابعين لعملاء
⸻
اليوم 3: قوّي المحتوى بصرياً
💡
• الصورة أهم من الكلام
• استخدم أدوات مثل: AI، Canva، قبل/بعد، مخططات، مود بورد
• الهدف: توقف بصري، تفاعل، حفظ ومشاركة
اليوم الرابع: الاستمرارية أهم من الكمال
مرحبا!
هلأ صار عندك فكرة منيحة عن نوع المحتوى يلي لازم تنشره.
بس إذا عنجد بدك تكبَر على لينكدإن وتجيب عملاء لحالك، بدك ٣ شغلات أساسية:
1. محتوى قيّم
2. وقت
3. استمرارية
إذا ما عم تكبر، فأنت غالباً مقصر بشغلة من هدول.
مثلاً:
• فيك تكون عم تنشر محتوى ممتاز، بس إذا بتنشر مرة بالشهر، ما حدا رح يتابعك
• أو فيك تنشر كل يوم، بس إذا المحتوى ضعيف، كمان ما رح تكبر
رح نحكي عن الاستمرارية، يلي هي أساس النجاح.
أنا شخصياً عم بنشر مرة باليوم من أكتر من ٩ اشهر ، وعندي التزام عيلة وبشتغل أكتر من 40 ساعة بالأسبوع، فبعرف إنو فيك تلتزم، حتى لو وقتك ضيق.
⸻
هون 5 خطوات بتخليك تنشر باستمرار على لينكدإن:
1. حضّر المحتوى دفعة وحدة (Batching)
مع الزحمة، أول شي بينترك هو كتابة البوستات.
الحل؟ خصص وقت تحضّر فيه 3–5 بوستات مرّة وحدة بالأسبوع.
وإذا ما بتحب تقعد 3 ساعات، فيك تكتب كل يوم بوست بنص ساعة أو أقل.
2. أعد استخدام المحتوى (Repurpose)
ما في داعي تبدأ من الصفر كل مرة.
استفيد من:
• محادثة مع زبون
• مقالة كتبتها
• ملاحظة بإيميل أو عرض
• فكرة من عرض تقديمي قديم
بس غيّر الشكل ورتّبها كمنشور (مثلاً: “5 نصائح لـ…” – أو قصة قصيرة – أو رأي)
3. خزن أفكارك أول بأول
ما تبدأ أبداً بورقة بيضا.
كل ما خطرتلك فكرة خلال اليوم، سجّلها فوراً – سواء عالجوال، دفتر، أو حتى نوت صغيرة.
4. جدول بوستاتك (Schedule)
إذا حضرت المحتوى مسبقاً، استخدم الجدولة بلينكدإن:
• اكتب البوست
• اضغط عرمز الساعة جنب زر النشر
• حدد الوقت واليوم
وانت هيك مرتاح باقي الأسبوع!
5. خلّي النشر أولوية مو خيار
المشكلة مو إنك “ما عندك وقت”
المشكلة إنو النشر مو أولوية عندك حاليا!
سجّل عالتقويم، خصص ساعة كل أسبوع، وافتح مجلد سميه “افكار لينكدان ” وجمّع فيه كل شي ممكن يلهمك تنشر.
⸻
تذكير مهم:
• 80% من منشوراتك لازم تكون قيمة حقيقية
• و20% للترويج لخدماتك أو كورساتك أو متجرك (مثل Stan Store)
⸻
الخطوات العملية لليوم:
• افتح تقويمك وحط ساعة بالأسبوع لكتابة المحتوى
• أنشئ مجلد على كمبيوترك اسمه “محتوى لينكدان” وخزّن فيه كل شي بيلهمك
⸻
ملاحظة:
المحتوى القوي ما له قيمة إذا ما حدا شافه…
بكرا رح نحكي عن أسرار رفع التفاعل والمشاهدات!
خليك متابع
⸻
#لا_للتصميم_العشوائي
#لينكدإن_للمهندسين
#محتوى_معماري
#تسويق_ذكي_للمصممين
#تصميم_داخلي_احترافي

اليوم التالت من دورة لينكدإن للمعماريين والمصممين: كيف تخلي المحتوى تبعك يخترق الخوارزميات ويتفاعل معه الناس! بس قبل ما نبلّش، خليني أذكّرك شو عملنا لحد الآن: اليوم الأول: حددنا ليش عم تنشر، و محتواك موجه لاي فئة . شو الهدف من وجودك على لينكدإن؟ تحصل…

اليوم التالت من دورة لينكدإن للمعماريين والمصممين:
كيف تخلي المحتوى تبعك يخترق الخوارزميات ويتفاعل معه الناس!
بس قبل ما نبلّش، خليني أذكّرك شو عملنا لحد الآن:
اليوم الأول:
حددنا ليش عم تنشر، و محتواك موجه لاي فئة .
شو الهدف من وجودك على لينكدإن؟
تحصل على عملاء؟ تبيع كورسات؟ تبني براندك الشخصي ؟
وحددنا شريحة الجمهور يلي بدك توصلهن: أصحاب فلل؟ مطوّرين؟ أطباء بدهم يفتحوا عيادات؟
اليوم الثاني:
تعلمنا أنواع المحتوى الأساسية:
محتوى واسع: لحتى توصل لناس جداد وتكبر جمهورك
محتوى سلطة وخبرة: لتثبت إنك خبير وتكسب ثقة العملاء
محتوى ترويجي: لتعرض خدماتك وتحوّل المتابعين لعملاء حقيقيين
هلأ نجي للجزء يلي بيكمل المعادلة:
اليوم التالت: كيف تخلّي خوارزمية لينكدإن تحب محتواك؟
المحتوى القوي لحالو ما بكفي…
إذا ما كان باكج قوي بصريًا، رح يمرق الناس من جنبه وما ينتبهوا عليه!
البشر كائنات بصرية… يعني الصورة بتجذب أكتر من ألف كلمة.
شو يعني محتوى بصري للمهندس أو المصمم؟
صور تصاميم باستخدام الذكاء الاصطناعي
( هالشي انا ركزت عليه من ٩ اشهر )
صورة "قبل وبعد" لمشروع
مخطط معماري بسيط لاختيار خيار من خيارين
مود بورد
فيديو قصير (Reel/Story) لفراغ
حتى لقطة من تعليق عميل مبسوط (screenshot)
أمثلة محتوى بصري بيشد الانتباه:
إنفوجرافيك فيه "5 أخطاء بترتكبها بتصميم العيادات الطبية"
جدول بيقارن بين تصميم تقليدي وحديث لمساحة مفتوحة
لقطة شاشة من إيميل عميل كتبلك:
"العيادة صارت تحكي عنّا!"
كروكي لفكرة مشروع... حوّلتها لصورة أنيقة بكام قالب من Canva
ليش هالشي مهم؟
بيخلق "توقّف بصري" بخط التايملاين
بيعطي مساحة أكبر لمنشورك
بيساعد الناس تتفاعل، تشارك، وتحفظ البوست
كيف تعمل محتوى بصري بسهولة؟
باستخدام أدوات مثل Canva:
اختار قالب بسيط (دور على “infographic” أو “architecture”)
جزّء النص لأقسام قصيرة وسهلة القراءة
أضف رموز بصرية أو صور توضيحية (icons، صور من شغلك)
خليك بسيط ومرتب — ما تعقّد التصميم!
نصيحة:
حول كل فكرة أو "جملة قوية" عم تكتبها بمنشور… لصورة بصيغة تصميمية.
هيك بتحوّل كل محتوى مكتوب إلى منشور بصري جذّاب.
خطواتك اليوم:
بلّش حوّل جملك القوية (One-liners) لمنشورات بصريّة
جرّب الإنفوجرافيك بـ Canva
خزّن صور، كواليس، سكرينشوتات بتقوّي قصصك
بس يمكن تقول لحالك:
"هالشي بده وقت وشغل!"
صح، وبكرا الجواب الجاهز!
اليوم الرابع رح نغطي كيف تعمل محتوى أسرع بكتير،
وبنظام يخليك تجهّز أسبوع كامل بـ ساعتين فقط!
تابعني… لأن لينكدإن عم يتحوّل لأقوى مكان للمهندسين الجادّين.
#لا_للتصميم_العشوائي
#لينكدإن_للمهندسين
#محتوى_معماري
#تسويق_ذكي_للمصممين
#تصميم_داخلي_احترافي
الصورة المرفقة نشرتها على حسابي لجعل المتابعين يختاروا حل من حلين لمكتب

حملة
#لا_للتصميم_المجاني
لأن التصميم مو "رسم"... التصميم هو العمود الفقري لنجاح أي مشروع.
الناس بتطلب "فكرة مبدئية مجانية"، كأنها عم تطلب الأساس ببلاش...
بس خليني اسألك:
هل كان ممكن لزها حديد تغيّر شكل العمارة لو كانت تشتغل مجانًا؟
هل كان ممكن لتاداو أندو يصنع التوازن بين الخرسانة والضوء لو ما قدّروا فكره؟
هل كان ممكن للمعماري حسن فتحي يبني مدارس وقرى كاملة بدون ما يعترفوا بأهمية رؤيته التصميمية؟
التصميم هو التخطيط، وهو الرؤية، وهو الحل.
هو يلي بيخلّي المقهى ينجح، والمكتب يرتاح، والعيادة ترتبط بعقل الزبون قبل ما حتى يبدأ العلاج.
التصميم المجاني = إهانة للفكرة، وللخبرة، وللسنين يلي انصرفت بالتعلم والتجريب.
بدون تصميم:
الميزانية بتنصرف غلط
التنفيذ بيتأخّر
المشروع بيفشل وظيفيًا وجماليًا
كل خط من خطوط المصمّم، إله سبب، إله هدف، إله رسالة.
فإذا بتحترم شغلك، تعبك، ومستواك المهني،
ارفع صوتك وقولها بكل ثقة:
أنا لا أقدّم تصميم مجاني.
أنا أقدّم حلول، نجاح، وهوية بصريّة تترك أثر.
#هندسة_معمارية
#تصميم_داخلي
#قيم_خبرتك
#لا_للتصميم_المجاني
#صمم_باحتراف

ETHEREAL LOUNGE الورشة مدتها 15 دقيقة بس كتير مفيدة بنصحكم بمشاهدتها لعشاق الاوفركست مود

ملفات العمل وبعتذر عالتأخير